సాయిదేవుని చల్లని చూపులు !

శ్రీసాయినాథాయనమః 

సాయి చరిత్రకు హృదయంలాంటి ప్రత్యేక కథనుగూర్చి అవలోకిద్దాము. ఇది శ్రీసాయిసచ్చరిత్ర 18-19 అధ్యాయములలొ చాల విపులంగా చెప్పబడినది, ఎక్కువుమంది పాఠకులకు తెలిసినదే. సంగమనేరునుండి  రాధాబాయి యనే ఓముసలమ్మ షిరిడి జేరి బాబా ఉపదేశమిచ్చేవరకు ఉపవాసముండదలచి మూడురోజులు తనబసలోనే అన్నపానీయాలు మానివేసినది. సన్నిహిత భక్తుడు శ్యామా  బాబా కీవిషయం తెలుప, బాబా ఆమెను పిలిపించి చాల మధురంగా యిలా మాట్లాడారు. " ఓ తల్లీ!, ఉపదేశమిచ్చుట మా సంప్రదాయము కాదు. కేవలము గురునిపై భక్తే ముఖ్యం. నేను నాగురుని 12 సంవత్సరాలు మిగుల శ్రద్ధ, సహనాలతొ సేవించాను. దేహశక్తులన్నిటిని కన్నులలో జేర్చి, నిద్రాహారాలు మాని రేయింబవళ్లు వారిపై దృష్టినిలిపే వాడిని. నామనసెప్పుడు వారియందే నాటుకొనియుండేది. కాని వారు  నాకెలాంటి ఉపదేశమివ్వలేదు. వారు తమదృష్టి చేతనే నన్ను కాపాడుచుండెడివారు. తాబేలు తన పిల్లలను కేవలము తన చూపులతొ పెంచినట్లు, నన్నుగూడ మాగురువు తమ దృష్టితోడ పోషించెడివారు. కనుక నీవుకూడ నీ ఆలోచనలు  పనులు  నాకోసమె వినియోగించుము, నావైపు సంపూర్ణహృదయంతో చూడుము. నేను నీవైపు అటులనే జూసెదను. ఈ మజీదులో నేనెపుడు సత్యమునే పలికెదను." ఈమాటలకు ఆమె తృప్తిచెంది  బాబాకు నమస్కరించి ఉపవాసము విరమించినది.
కావున భక్తులు మిగుల శ్రద్ధ, సహనాలతొ గురునిసేవించుటే గురుకృప, అనుగ్రహము పొందుటకు చక్కటిమార్గంగా చెప్పబడినది. ఈ భావనే ఈక్రింది ప్రేరణాగీతానికి  మూలము. మంచిభావనలతొ గురుని సేవించుట ఎంతో శ్రేయస్కరముకదా !

కన్నులతొ మనసు మనసు

కన్నులతొ మనసు మనసు కలిపి కలిపి చూడరమ్మ
సద్గురుని పాదముపై గురిని గురిని మోపరమ్మ

కాలగతిలొ కదలాడె తోలుబొమ్మ జీవియమ్మ
పరిధిమించి పాకలేని పరుగులెన్నొ జీవికమ్మ
పొగమూటల దొంతరలె సిరులు ధరలొ చూడరమ్మ
సద్గురుని పాదముపై గురిని గురిని మోపరమ్మ

పంచేంద్రియ భావనల మంచి మంచి చేయరమ్మ
పంచామృత ధారలుగ వర్షింపగ జూడరమ్మ
చిత్తములో శివుని గురుని అభిషేకము సేయరమ్మ
సాయిదేవు చూపులవియె తాబేలు తల్లివమ్మ!

శ్రీసాయి కరుణా కిరణాలు అందరిపై ప్రసరించుగాక!
అందరికి శుభమగుగాక!
ఓంసాయి శ్రీసాయి జయజయ సాయి!