నీకు పూజ లెట్లయ్యా ?

శ్రీసాయినాథాయనమః 

నీకు పూజ లెట్లయ్యా ?

ఎట్లయ్యా, ఎట్లయ్యా, నీకు పూజ లెట్లయ్యా ?

సాయి సాయి సాయయ్యా ,మాకు తండ్రి నీవయ్య!

పూలు ఎన్నో తేవాలంటె , పువ్వుల మనస్సు నీదయ్యా,

జలములెన్నో తేవాలంటె , గంగాయమునలె  నీవయ్యా!                || ఎట్లయ్యా ఎట్లయ్యా ||

మల్లే మాల వెయ్యాలంటే ,తెల్లని  మల్లె నీవయ్యా ,

చందనలెన్నో అద్దాలంటే , చల్లని  వెన్నెల వీవయ్యా !                   || ఎట్లయ్యా ఎట్లయ్యా ||

ఫలములెన్నో తేవాలంటే ,పుణ్యఫలమే నీవయ్యా,

భావాలెన్నో గూర్చాలంటే ,భావాతీతుడ వీవయ్యా!                        || ఎట్లయ్యా ఎట్లయ్యా ||

దీపాలెన్నో చూపాలంటే ,దీపపు వెలుగూ  నీవయ్యా

ధూపాలెన్నో వేయాలంటే ,దునివెలిగించితి వీవయ్యా                    || ఎట్లయ్యా ఎట్లయ్యా ||

కప్పుర ఆరతులిద్దామంటే , పాపా హరుడవు నీవయ్యా,

కమ్మను వాసను లిద్దామంటే , గుప్పను పరిమళ మీవయ్యా !       || ఎట్లయ్యా ఎట్లయ్యా ||

విందులెన్నో ఇద్దామంటే , అన్నదాతవె  నీవయ్యా,

మంత్రాలెన్నో చదవాలంటే, మహిమల సామివి నీవయ్యా !           || ఎట్లయ్యా ఎట్లయ్యా ||

దానాలెన్నో చేయాలంటే , దానకర్ణుడ వీవయ్యా ,

కానుకలెన్నో ఇద్దామంటే , దక్షిణలిత్తువు నీవయ్యా !                    || ఎట్లయ్యా ఎట్లయ్యా ||

నర్తనపూజ చేయాలంటే , నటరాజువే నీవయ్యా ,

వెన్నముద్దలిద్దామంటే , నవనిత చోరుడ వీవయ్యా !                     || ఎట్లయ్యా ఎట్లయ్యా ||

యోగాలెన్నో జేదామంటే , యోగిరాజువె నీవయ్యా ,

త్యాగాలెన్నో చేదామంటే , ఫకీరు వేషము నీదయ్యా !                    || ఎట్లయ్యా ఎట్లయ్యా ||

అన్నిమరచి తలచిన వారికి , అంగారక్షకుడీవయ్యా,

శాయా శక్తుల గొలచినవారికి , భుక్తీ ముక్తీ నీవయ్యా!                    || ఎట్లయ్యా ఎట్లయ్యా ||

శ్రీసాయి కరుణాకిరణాలు అందరిపై ప్రసరించుగాక!
అందరికి శుభమగుగాక!
ఓంసాయి శ్రీసాయి జయ జయ సాయి!