సాయిస్వప్నము

శ్రీసాయినాథాయనమః 

సాయి స్వప్నము 

స్వప్నమైనది సాయి స్వప్నమైనది

బ్రహ్మ ముహూర్తవేళ స్వప్నమైనది

వేలభాను కాంతులేమొ నింగినిండెను

మంద మలయ పవనమేమొ హాయిగొలిపెను

సాయిపాద కమలమేమొ కనులనిలచెను

మనసు నాట్యమయూరియై జగము మరచెను                   || స్వప్నమైనది ||

ధుని ధునిలో పొగలేమో పలుచనాయెను

జలదివ్వెల జిలుగులేమొ రెపరెపాడెను

గురుదేవుల తేజమేమొ కనుల దోచెను

చిరునవ్వుల చిన్మయుడే ముందు నిలచెను                      || స్వప్నమైనది ||

భస్మముతొ సద్గురువు కొలువు దీరెను

భక్తులతొ ద్వారకమయి పొంగిపోయెను

హారతుల జాగరణల హోరు పెరిగెను

మందగతుల తనువేమొ చిందువేసెను                             || స్వప్నమైనది || 

కరుణాకటాక్షంబుల సాయి జూచెను

వరదాభయ ముద్రతో ప్రీతిగొల్పెను

కాలమటులె  సాయిలీల ఆగెనాగెను

కనులటులే మైమరపున సజలమాయెను                        || స్వప్నమైనది ||

అచేతనం సచేతనం ఏకమాయెను
పిపీలకం హిమాలయం తాను  నిండెను

నదిగమనం  సాగరమున ధన్యమాయెను

గురుసన్నిధె ఈ  జన్మకు భాగ్యమాయెను                        || స్వప్నమైనది ||  

శ్రీసాయి కరుణాకిరణాలు అందరిపైప్రసరించుగాక !
అందరికి శుభమగుగాక!
ఓంసాయి శ్రీసాయి జయ జయ సాయి!